Mangan (ra) Enak

Yuhuuu...gajiaaaannn.... iso mangan enak ki bar iki :)

Wis pirang-pirang sasi iki pancen jatah gajian mundur terus tanggale. Mulakno angger tekan akhir wulan ngono kae wes ketar-ketir rasane. Trus malah iso dienggo totohan barang (jan-jane iki ra pareng lho) njajal sasi ngarep gajian tanggal piro. Wealah, wis ngelu ngrasakke ke-pending blanja malah kudu mikir anggaran nggo totohan barang. Repooottt....

Jan-jane sih gajiku isih wutuh, malah turahan THR wingi kae ijek akeh. Ning yen aku ora melu-melu nggresula koyok kanca-kancaku kan ngko piyeeeee.... Daraki meh anti mainstream... ra penak to yoooo... Mula terus aku yo melu solider, mangane yo dipas-paske karo season tanggal tuwa ;)  Sega rames(ti) lawuh tahu tempe wae. Takpendhem jero wae kasunyatan nek jan-jane duwitku ijik sakthekrak :)

Nah, begitu gajian kan iso mangan enak ki. Njaluk tulung office girl (OG) ning kantor nggo nukokke sega padhang. Hahahaa... oalah wong ndeso, mangan enak kok yo mung sega padhang tok lho obsesine :)

"Tukokne sega padhang yo Liz, lawuhe ayam, sing dhadha. Nganggo kuah rendang sing akeh." Ngono mau kuwi pesenku karo Liz (dudu jeneng asline), OG sing manis kinyis-kinyis.

"Njih Mba...."  Liz bablas mangkat ning warung. Aku ya selak pengin mangan sego padhang idamanku, soale isuk mau durung sarapan. Mripatku wis krasa kremun-kremun, awakku ndredeg. Mbokmenawa wis ngelih tenan iki.

Sepira senengku weruh blegere Liz wis tekan ruanganku meneh. Elah, cepet banget ik le tuku.

"Mba, dhodhone ora ono, iki taktukokke paha. Kersa nopo mboten?" pitakone Liz.

Oalah Liiizzz....Liiiizzz... wis pirang taun nukokke aku sega kok ijek durung apal nek aku ora doyan pupu. Ning yo meh muni ngono kuwi mau ora tegel. Lha wong aku ki yo mung njaluk tulung lho, mosok kok meh maido.

"Kuwi nggo kowe wae Liz, wes nyoh taksangoni duwit meneh, tukuwo rendang wae yo." Jan, aku apikan tenan yoh, koyok dewi seko kayangan *gubraaakk...dewine sing asli ceblok

Liz banjur mbalik warung meneh, koyok setrika wae sliwar-sliwer gara-gara pupu pitik. Mesakke ik. Tapi kan aku kudu tegas, kudu ngugemi prinsip. Ngko nek Liz duwe pikiran aku ki wong sing gampangan piye jal. Lak ora kajen to aku mengko.

Ora watara suwe Liz wis tekan ruanganku meneh, menehke bungkusan rendang sing duduhe sajak uinuuukk biyanget. Gage-gage le ku meh mangan. Ning ijik takempet ben rada wibawa sithik ning ngarepe Liz.

"Wis kana, kowe yo ndang maem yo Liz, iku pupune nggo kowe wae."

"Injih Mba, matur nuwun," saurane Liz.

Wejiiiiaannn... dina iki aku dadi malaikate Liz ketoke *macak mesem ayu anggun

Wis ora sranta rasane kudu ndang mangan sega padhang. Kapan meneh mangan enak yen ora pas tanggal enom ngene iki. Bungkusan sega takbukak, rendang takguyangke ning ndhuwure sega. Tangan tengen nyekel sendhok, tangan kiwa nyekel krupuk terung. Wis siap tempur tenan iki aku.

Klethuk...klethuukk... eladalah opo ikiiii.... Segane kok rasane aneh. Duh Gusti cobaan apa meneh iki sakwise tragedi pupu mau?

Cepet-cepet nyandhak wedang tehku. Cleguk...cleguuukk... takombeni sing akeh. 

Enake iki takteruske opo ora yo le mangan? Dilematis banget ik. Perjuangan le entuk sega padhang wae wis dilakoni Liz, ndadak nganggo mbaleni tuku lawuh neh. Mosok meh ora takenteke manganku iki. Tapi......

Rekane pengin mangan enak, jebule bakule ning warung padhang iku yo rodo trondholo. Sega nglethis kok yo didol ki lho. Kira-kira nek bakule dikon mangan kabeh sega sakliwetan iki njajal piye perasaane? 

Rendang taksawang-sawang karo mbrebes mili..... Ning aku yo paham, ora entuk nggresula. Ijik iso tuku sega padhang lak berarti ijik diparingi rejeki sing akeh karo Gusti. Piwulang apik-apik seka wong tuwaku tansah takeling-eling. Mbokmenawa pancen wis kudu ngene kahanane.

-----

foto ngampil saking unsplash.com under CC0 license

Read More »

Tilpun Keset

Lah, mosok ono tilpun marai keset? 

Sik siiiik... genahke sik frekuensimu, Nda. Iki dudu keset koyok iklan cairan pembersih kewanitaan loh. Keset iki mangsudku males. Byuuh byuuuh... yo ngene iki yen keyboarde ora ana tandha taling utawa pepet, dadi ora jelas mbedakno [e] pas ngucap t[e]mpe lan p[e]gel.

Nah, mbalik ning tilpun keset mau, jan-jane arep ngomongke opo to?

Iki loh, aku lagi gumun, eeee jaman saiki ono yoh tilpun ndadak dicagaki barang. Takkiro mung carrier munggah gunung thok sing ono cagake *mesem sinis marang si Anibudin Zuhro :p

ngampil gambar saking mriki

Dadi ngene, wong jaman saiki ki lak meh patlikur jam anggone nyekel tilpun, utawa luwih pase taksebut smartphone yoh. Dulit iki dulit iku, nyekrol munggah medhun ngetan ngulon, mbuh opooooo wae sing diwaca lan dikerjakke. Mula njuk tangane pegel kesuwen nyekel tilpune. Butuh asisten khusus nggo nyekeli tilpun pintere mau.

Aku ki nembeeee ae ngerti loh ning salah sawijining online shop babagan tilpun keset iki. Taksawang-sawang, eeehh ketoke yo apik tenan. Pas lagi diskon san, regane ora ngasi seket ewu tibane.  *plis deh ah, iku dudu job ripiu utawa nge-buzz :)

Piye miturutmu, para sedulur, mupangat tenan yoh yen duwe cagak tilpun iki. Aku loh kerep lalinan, ndokok tilpunku ning ndi. Bola bali dimiskol, kesingsal ning ndiiii bae. Kadang-kadang pas dimiskol batrene pas entek sisan. Ngalamat tambah suwe le kesingsal. Jajal yen duwe cagak iki, lak tilpunku garek temangsangke wae ning kono, ora perlu bolak balik nggoleki.

***iklan lewat : Bojoku kemliwer lan noleh sediluk. Njuk taksambati, "Pakne, pundhutke iki loh tilpun keset, murah ki, mumpung lagi diskon ning onlensop. Mengkooo...."

"Sik Bu, aku tak memburi sik, wetengku mules ki."

Ora sopan. Huh.

Lanjoooottt....

Nah, sakliyane ben ora lali le ndokok tilpun, ketoke cagak iki yo iso mendukung hobiku yoh. Seneng potrat potret dhewe, ethok-ethoke mesem lan ora ndelokke kamera, ben dikiro difoto wong liya.

Tilpune lak iso diwenehi timer, sepuluh detik ngono lah, pas banget nggo nata esem lan gaya modhel terkini. ....tri...tu....wan.... cepreeettt... beres wis, sakjebole memory card anggonku potrat potret yen duwe tilpun keset iki.

Piye Bune, mau meh matur apa? Dumadakan bojoku liwat meneh.

Rada ra patiyo takgatekke olehe tekon, ngko ditinggal memburi meneh malah dadi gelaku.

Piye piyeee... ana apa?

Eeeehh... serius jebule le takon, kesempatan kiy.

Iki loh Pakne, cagak sing diarani tilpun keset iki pas banget yoh. Dadi awake dhewe ora kesel meneh le nyekel henpon. Tangane iso kanggo ngerjakke liyane. Dadi iso luwih efektif ngono loh wektune.

Dadi awakmu pengin ta Bu duwe sing koyok ngono iku mau? Jajal didelok dhisik henponmu jenise apa? Pantes po ra nganggo cagak iku?

Aku njuk kamitenggengen ndelok henponku. Dumadakan ana rasa lara ning dhadhaku. Kelara-lara nyawang gambar tilpun keset mau, njuk delok tilpun sejuta umatku. 

Iyo yo, cagak iku mau iso nggenggem henponku po ora yoh? 

* Crita iki mung pacelathon ngayawara, aja nemen-nemen dilebokne ati :)

Read More »

Piwulang Seka Rewang

Oalah, wis telung dina iki Semarang udan terus, seka isuk umun-umun nganti tengah wengi. Jaaan udan ra ono mandhege. Sok dhong deres, sok dhong mung grimis, sing jelas ra entek-entek banyu sing utah seka langit kuwi.

Musim udan ngene iki pancen marai perkara. Akeh sanak kadang sing omahe kebanjiran. Muga-muga enggal diparingi kalonggaran dening Gusti, ndang surut banyune. Alhamdulillah omahku ora kebanjiran. Ning dina Setu wingi, tanggal wolulas Januari aku kepeksa mbolos, ra mangkat ning kantor mergo sakndalan-ndalan banyune wis tekan dhuwur dhengkul. Heleh, mung mlebu setengah dina wae owg, eman-eman mesin montorku aah... *mbalik njingkrung krukupan kemul :)

Duruh meneh urusan kumbahan. Masiya nganggo mesin cuci, ning yen ora dipepe kena srengenge, tetep wae pas wis garing klambine mambu. Meh disuntaki pewangi klambi sakgalon yo tetep wae amem rasane. Wangi campur bacin ngono loh dadine. Byuh byuuuhh... anakku wedok wis protes kok, jarene seragam sekolahe mambu ora enak. "Lha piye, po meh mangkat sekolah nganggo sarung?" taktekoni ngono wae :D

Biyasane ncen urusan ngumbahi ki wis ditindakke rewangku pocokan. Jenenge Budhe Tari. Ning pas dina Setu iku Budhe Tari ora iso mangkat mergo omahe kebanjiran. Omahe cedhak Masjid Agung Jawa Tengah. Masjid gedhe magrong-magrong sing kahanane beda kaya langit lan bumi karo omah-omah penduduk ning sekitare. Omahe Budhe Tari iki yen udan mesti kebanjiran, yen pas angine gedhe mesti gendheng omahe akeh sing tiba. Jan melasi tenan. Muga-muga diparingi sabar yo Dhe.

Rewangku iki ora kakehan omong uwonge. Angger teka pas jam setengah sanga isuk, langsung nyandhak kumbahan. Sakbare ngumbahi lan mepe, deknen bablas nggosok. Mengko pas jam setengah sepuluh anakku lanang mulih seko PAUD, Budhe Tari gage-gage ndulang. Anakku lanang arang banget le gelem sarapan, biasane mung ngombe teh sakclegukan lan nithili roti marie gosong kagungane yangtine. Bar ndulang Budhe Tari nutugke anggone nggosok. Bakda Dhuhur deknen ngaso lan mangan awan. Njur sing paling keri ditindakke yaiku nyapu lan ngepel. Jam telu utawa setengah papat biyasane wis dipethuk anake.

Sakliyane menengan lan sregep, rewangku iku jujure pol. Tau nemu duwit satus ewu ning sak kathok jinsku yo dibalekke. Padahal aku wes lali lho, saking akehe duwit ning sak (duwit kricik mangatusan maksudku) hehehee... Dompet, hape, jam tangan lan sembarang kalir sing dho ting glethak ning meja yo ora tau ilang. Jan marai tambah tresna wae aku marang rewangku iki. *B.Tari : yen tresna undhakke bayarane to jeng, eeeh....spleteran :D

Mula aku yo sok nggumun marang para rewang sing senenge tumindak julik. Contone yo iki. Isuk mau aku maca status fesbuke kancaku sing lagi blanja ning pasar. Deknen uripe ning Jakarta, dadi ya akeh-akehe obrolan ning pasar ya nganggo loe guwe ngono kae. 

"Bang, iklan salmon berapa Bang?"

"Sekilonya seratus ribu sekian Neng."

"Kalo ikan mujahir, Bang?"

"Dua  puluh lima ribu."

"Ya udah mujahir aja ya Bang."

Ana bocah wadon loro lagi takon rego iwak, umur-umurane yo sekitar limolas nganti pitulas taun lah. Sing tekon karo bakul iwak mau Si A. Si A dijawil-jawil karo kancane Si B, glenikan nganggo Basa Jawa, dikira ra ana sing mudheng. Apes tenan merga kancaku mau wong Jawa asli, dadi mudheng apa wae sing dicatur bocah loro iku mau.

B : Kok malah tuku mujahir to, mau lak dikongkon nyonyah tuku iwak salmon.

A.: Kaceke adoh owg Nda, mayan isa nggo tuku pulsa.

B : Ngawur ae kowe iki, ngko yen konangan dudu iwak salmon sing mbokmasak piye?

A : Ora oraaa... nyonyah kan tekane mbengi. Anake po mudheng iku salmon po dudu. Cah cilik ngono ae kok. Tenang wae, ngko yen nyonyah teka ngomong wae iwake wes dientekke adek. Beres.

Ealaaahh... meh nyusul Anas nggandhul ning Monas po piye kowe nduk. Ngene iki bibit-bibit ora apik sing tumbuh subur ning ndi ndi. Maca status fesbuke kancaku mau aku dadi tambah ngajeni rewangku sing ra tau nggabuk utawa 'mark up' rega. Malah luwih kerep nuduhi aku toko ngendi wae sing dodolane luwih murah tinimbang toko sing biyasa taktukoni. 

Ya wes, waspada wae ya prakanca. Rewang iku ncen mung manungsa, manungsa iku sumbere kaluputan. Ning tansah eling ya yen manungsa sing mulya iku dudu manungsa sing ora tau salah, nanging manungsa sing ngerti menawa wis tau salah iku ora mbaleni neh. Kalebu ngandhani wong liya sing arep tumindak salah. Elingke, ojo dijarke wae, mengko yen keblasuk-blasuk awake dhewe melu duso lho.

Read More »

Mendhem Jero.... Jeruuuuuu buaangeeett...

Gara-gara maca tulisane mak Citra Savitri, kanca ngeblogku, aku dadi pengin nulis nganggo Basa Jawa iki. Ben ora sok keminter lan kemenggres nanging lali karo basane dhewe. Kebeneran iki lagi ngelu ngrasakke kahanan bangsa sih sangsaya suwe sangsaya mbludreki.

Kaya sing lagi rame dadi 'trending topic' ki, masalah goyang dombret ning salah sawijining stasiyun tipi. Iki ora masalah pencemaran nama baik stasiyun sing bersangkutan lho ya, tapi iki jelas-jelas kasunyatan urip. Tambah akeh wae wong-wong ra mutu sing dumadakan dadi pusat perhatian. Oraaa...aku ora jeles, sumpriiit... aku terlalu ayu lan anggun yen dienggo bahan guyonan. Setuju ya Nda.... (ingkang langkung sepuh, ampun duka nggih kula celuk Nda, kan saged ugi punika singkatan saking Ayahanda, Bapaknda, Ibunda, Mamanda) ;)  Piye ndaaa.... Ojo ngono to ndeeesss.... iku celukan sayang nggo kanca-kanca cedhak, nggih nyuwun gunging samudra pangaksami menawi mboten kaleresan *trok thok thok thooookk.... tabuhan gamelan mulai :)

Ket pertama acara iku tayang ning tipi, atiku sueeriiiikkk buaangeeett.... Dadi ra duwe tontonan sing marai seger ning ati meneh. Ngene ceritane. Aku ki arang banget nonton tipi yen ning omah. Mulih seko kantor wis kesel, bar kuwi nguplek karo bocah-bocah. Nyepakke maem lan ngancani sinau mbarepku. Pas bar Isya' mulai jam wolu kan biyasane ning stasiun tipi nomer 4 (ning tipiku lho iki) mesti ono filem-filem apik. Lha kuwi sing iso dadi tombo kesel paling mantep. Masiya kerepe nyetel filem jaman taun ra enak kaya Die Hard (angel matine), Die Hard II - Die Harder (matine tambah angel), Die Hard With A Vengeance (bales-balesan nganti modar), terus nganti taun rongewu pitu metu meneh Live Free or Die Hard (milih ndi, urip gratisan po angel modare hehehee....), tipi kesayanganku iki nayangke terus. Bolak balik sisan, misale iku kaset ngono mungkin wis nglokor yak'e yo :)  Sing taun rongewu telulas, A Good Day to Die Hard (meh mati ae ndadak milih dina sing apik), aku lali ik, wes nonton po durung yoh... *luwehke wae :)

Sakliyane filem sing tokohe Bruce Willis iku mau, aku yo seneng banget nonton filem-fileme mas Mel Gibson kayata Lethal Weapon (kawit seko sing pertama nganti tekan sing kapat), Brave Heart, Ransom, Payback, lan The Patriot. Meh podo karo nasibe mas Willis ning Die Hard, mas Gibson senenge yo remuk-remukan yen pas eksyen. Momprot ra karu-karuwan rupane ning filem Lethal Weapon, nganti ono adegan dewekne nggawe balunge iso mengsle barang. Weleeehh... rodo nggilani sih jan-jane, ning tetep luwih nggilani sing acara goyang-goyang kuwi lah. Tapi aktinge ning The Patriot apik tenan. Didhapuk dadi salah sawijining pejuwang Amerika sing ngupayakke dilorote rasisme ning kana. Nekad nglawan Inggris sing maune pancen nguwasani dharatan Amerika. Wis, top tenan sing iki. Opomeneh ning Brave Heart, nganti nangis-nangis wis yen pas nonton. Monggo sami dipadosi kiyambak nggih trailer fileme, aku ra ngerti link-e ki.

Aku uga seneng nonton Tobey Maguire ning filem Spiderman, seri pertama nganti katelu. Opo maneh mas ganteng Brad Pitt ning filem Seven, Seven Years in Tibet, Devil's Own, Mr. & Mrs. Smith lan liya-liyane. Ning filem Seven Years in Tibet, mas Pitt meranke dadi pendaki gunung sing mangkat ning Himalaya. Ealah, wis nggantheng, pendaki sisan, jan koyok bapakne bocah-bocah mbiyen hehehee... *ra sah serik :p

Yen pemain filem wedok aku senenge nonton mbak Sandra Bullock ning filem Speed. Aku ora ngidola karo si Keanu Reeves babar blas je. Terus aku yo seneng ndelok aktinge Rene Russo ning film Lethal Weapon (apes men partner-an karo Mel Gibson hihihi...),  In The Line of Fire lan The Thomas Crown Affair. Mbakyu Catherin-Zeta Jones yo mumpuni tenan yen main film. Liyane ning Zorro, aku seneng tenan pas deknen main Entrapment, opo meneh maine karo aktor tuwo favoritku, mbah Sean Connery ;)  Wis alur ceritane apik, pemaine ngetop, lak yo ra tandingane karo acara goyang ra jelas kuwi to? Mathuk to?  *sing mathuk enggal komen yoh :)

Dadi iso ngrasakke to sepiro cuwane atiku rikala pas jam tayang filem-filem kesenanganku iku mau diganti karo tayangan sing saike nasibe garek ngenteni komplenane wong sakjagat raya. Tipi wes ra iso meneh dadi panglipur ati. Nonton berita? halah, kuwi ngono iso lewat internet. Rekane nonton tipi kan nggolek hiburan, malah entuk-entukane berita gas elpiji mundhak, ndedel sisan. 

Oalah Gusti, paringono welas ngene iki. Mosok iyo dadi wong cilik iku mung iso ngelus dhadha karo mendhem jero ngene iki. Jeruuuuuu buaangeeett.... Tatu atiku, ning ora iso piye-piye, mung isane nampa lan nampa wae. Mulane kanggo kanca kabeh sing iso dadi uwong penting ning pemerintahan, gatekna to nasibe rakyatmu iki. Masiyo tuku gas elpiji satus telung puluh lima ewu jik isa, ning lak mundhake sing meh tikel pindho iku iso dienggo blanja liyane neh. Seket ewu kan lumayan to nggo tuku buku. Iso entuk siji po loro, tergantung regane. Yen bukune rodo murah, yo iso entuk loro, ijek susuk pisan. Susuke iso nggo tuku uyah. Uyah iku penting lho nda, jajalen masak ra nganggo uyah, po enak rasane? :) 

Read More »